మెప్మా.. చెప్మా.. ఆ అధికారి ఎక్కడ?

– రహస్యంగా పోస్టింగ్

– పేరుకే మెప్మాలో  విధులు

– ఏడాదిగా రాకున్నా వేతనం, అలవెన్సు చెల్లింపు

– యూనియన్ పేరుతో విధులకు ఎగనామం

యూనియన్ నాయకుడినంటూ ఓ అధికారి కలెక్టరేట్ లో నాటకీయ పరిణామాలను నడిపిస్తున్నాడు. జిల్లా కేంద్రం నుంచి జరగకుండా అంతా ‘మేనేజ్’ చేసుకుంటున్నాడు. తనకు కేటాయించిన సీటులో కొలువును కొనసాగిస్తున్నాడా? అంటే అదీ లేదు. ఎంచక్కా తన వ్యాపారాలను చేసుకుంటున్నాడు. ఆ మధ్య పదోన్నతి వచ్చింది. కానీ వేరే జిల్లాకు వెళ్లాల్సి వస్తుందనే భయంతో ఇక్కడే ఓ శాఖలో ఏవోగా చేరాడు. ఆ అధికారి చేరిన పోస్టులోనే ప్రస్తుతం మరొకరికి పోస్టింగ్ ఇస్తూ సీసీఎల్ఏ నుంచి ఉత్తర్వులు జారీ అయ్యాయి. మరి ఆ పెద్ద మనిషి పోస్టింగ్ ఎక్కడో అనేది మాత్రం రహస్యంగానే ఉంచారు.

నిజామాబాద్, బతుకమ్మ : జిల్లాలో ప్రముఖ యూనియన్ నాయకుడిగా చలామణి అవుతున్న అధికారి తీరు వివాదాస్పదమవుతోంది. ఆయన ఏం చేసినా నడుస్తోందని ఉన్నతాధికారుల నుంచి కింది స్థాయి సిబ్బంది వరకు విస్మయం వ్యక్తం చేస్తున్నారు.  ఏడాదికాలంగా కార్యాలయం వైపు కన్నెత్తి చూడని ఆ అధికారికి ఎక్కడ పోస్టింగ్ ఇచ్చారనేది రెవెన్యూ విభాగంలో మిలియన్ డాలర్ల ప్రశ్నగా మిగిలింది. ఆ అధికారికి గతేడాది ఆగస్టులో తహసీల్దార్ గా పదోన్నతి వచ్చింది. అయితే వేరే జిల్లాకు వెళ్లేందుకు ఇష్టపడని ఆయన యూనియన్ నాయకుడిని అంటూ జిల్లా కేంద్రంలోని ఉంటున్నారు. పదోన్నతి రావడంతో వేరే జిల్లాకు పంపిస్తారని గ్రహించి మెప్మాలో ఏవోగా చేరారు. గత ఏడాది నుంచి  బదిలీ ఉత్తర్వులు వచ్చేవరకు ఆ కార్యాలయంలో అడుగుపెట్టకపోయినా నెలనెలా వేతనం, అలవెన్సులు మాత్రం తీసుకున్నారు. ఎన్నికల విధులు నిర్వహించకపోయినా పనిచేసినట్లుగా బిల్లులు పొందిన ఘనత ఆయనకే దక్కింది. ఏడాది దాటినా డిప్యుటేషన్ కు సంబంధించి పొడిగింపు లేకుండా ఏ శాఖలో ఉన్నది బయటకు పొక్కకుండాజాగ్రత్త పడుతున్నాడు. కలెక్టరేట్లోనే మరో విభాగంలో (ఎవరు అటువైపు చూడని) పోస్టింగ్ తీసుకున్నారా అనేది ఎవరికీ తెలియడం లేదు.

 యూనియన్ పేరిట

రెవెన్యూ సంఘాన్ని అడ్డుపెట్టుకుంటున్న ఆ అధికారి విధి నిర్వహణను పక్కన పెట్టి వ్యాపారాలు దర్జాగా చేసుకుంటున్నారని బహిరంగంగానే పలువురు పేర్కొంటున్నారు. యూనియన్ నాయకుడి ముసుగు ఉండటంతో పై స్థాయి అధికారులు సహకరిస్తున్నారంటున్నారు. యూనియన్ కు సైతం రెండేళ్లకోసారి ఎన్నికలు జరపాల్సి ఉన్నా ఆ ఊసే లేకుండాపోయిందని రెవెన్యూ ఉద్యోగులు వాపోతున్నారు. రియల్ ఎస్టేట్ వ్యాపారం చేసే సదరు అధికారి అదే పనిపై తరచూ హైదరాబాద్ కు వెళ్తూ ఇతరులకు మాత్రం యూనియన్ లేదా విధి నిర్వహణలో భాగంగా వెళ్లినట్లు నమ్మిస్తున్నాడు. రెవెన్యూ ఉద్యోగుల సమస్యల పరిష్కార నిమిత్తం సీసీఎల్ఏ కు వెళ్లినట్లుగా సంబంధిత వాట్సాప్ గ్రూపులో ఫొటోలు పెడుతుంటారని సహచర ఉద్యోగులు పేర్కొంటున్నారు.

అలాంటప్పుడు ఉద్యోగం ఎందుకు

జీతం మీద ఆధారపడి జీవనం సాగించేవారు ఎక్కడ పోస్టింగ్ ఇచ్చిన వెళ్లి చేస్తుంటారు.  ఇంకొందరు యూనియన్ ను అడ్డుపెట్టుకొని కొలువుకు రాకుండానే నెలవారీగా జీతాలు తీసుకోవడమే కాకుండా వేరే సౌకర్యాలను పొందుతున్నారు. ఇలాంటి వారికి ఉద్యోగం అవసరమా? అనే ప్రశ్నలు రెవెన్యూ ఉద్యోగుల నుంచి వినబడుతున్నాయి.

మెప్మా ఏవోగా  కలెక్టరేట్ ఏవో సతీమణి

కలెక్టరేట్ ఏవో సతీమణికి మెప్మా  శాఖలో ఏవో గా పోస్టింగ్ ఇస్తూ సీసీఎల్ఏ నుంచి ఉత్తర్వులు జారీ చేశారు. ప్రస్తుతం ఆమె నిజామాబాద్ ఆర్డీవో  కార్యాలయంలో విధులు నిర్వహిస్తున్నారు. యూనియన్ నాయకులే గాకుండా వారి కుటుంబ సభ్యులను సైతం జిల్లా కేంద్రంలో ఉంచడాన్ని దూర ప్రాంతాల్లో విధులు నిర్వహించేవారు జీర్ణించుకోలేకపోతున్నారు.