అర్ధరాత్రి దర్జాగా ఇసుక దందా

• మామూళ్ల మత్తులో వీఆర్ఏలు
• ఇసుక అసురులతో అంట కాగుతున్న సంబంధిత శాఖ అధికారులు

బతుకమ్మ: బిచ్కుంద : కామారెడ్డి జిల్లా బిచ్కుంద మండలంలో అక్రమ ఇసుక దందా జోరుగా కొనసాగుతుంది. చర్యలు చేపట్టాల్సిన అధికారులు నామమాత్రపు దాడులు నిర్వహించి చేతులు దులుపుకుంటున్నారని పలువురు బహిరంగంగానే విమర్శిస్తున్నారు. బుధవారం అర్ధరాత్రి మొదలుకొని తెల్లవారుజాము వరకు నిరంతరాయంగా పదుల సంఖ్యలో లారీలలో ఇసుకను దర్జాగా తరలించినప్పటికిని కంటి తుడుపు చర్యగా 18 ట్రాక్టర్ల ఇసుక డంపును సీజ్ చేసి చేతులు దులుపుకున్నారని పలువురు గుసగుసలాడుకుంటున్నారు ఇదిలా ఉండగా మరోవైపు అర్ధరాత్రి మొదలుకొని తెల్లవారుజాము వరకు నిరంతరాయంగా లారీలలో అక్రమ ఇసుక రవాణా జరిగినప్పటికిని కాపలదారులుగా ఉన్న వీఆర్ఏలు కళ్ళు మూసుకున్నారా? లేక అక్రమ దందాకు పక్కనే ఉండి పచ్చ జెండా ఊపుతున్నారా? అంటూ మండల ప్రజలు ఆశ్చర్య వ్యక్తం చేస్తున్నారు. నిత్యం అర్ధరాత్రి వేళల్లో పదుల సంఖ్యలో జీరో ఇసుక లారీలు నడుస్తున్న స్థానిక అధికారులు ఎప్పుడో పున్నమికి ఒక్కసారి ఇసుక లారీలను పట్టుకోవడం, కొందరు నేతలు వాటికి నామమాత్రంగా జరిమానా కట్టి విడిపించుకుని పోవడం పరిపాటిగా మారింది. ఎటువంటి అనుమతి పత్రాలు లేనిలారీలతో పదుల సంఖ్యల లారీలలో ఇనుక తరలించి సొమ్ము చేసుకుంటున్నారు. ఇసుక దందలో రాటుదేలిన కేటుగాళ్లు లారీలను రూట్లు మార్చి వారు అనుకున్న గమ్యాన్ని చేర్చుతున్నారనే ఆరోపణలు వెల్లువెత్తున్నాయి.

పట్టించుకోని సంబంధిత అధికారులు..

అనుమతులు పొందిన ఇసుక ర్యాంపుల్లో ఎలాంటి అక్రమాలు జరిగిన టిఎస్ఎండిసి,మైనింగ్, రెవెన్యూ శాఖ అధికారులే బాధ్యత వహించాల్సి ఉంటుంది.కానీ కంచె చేను మేసే చందంగా అధికారులు వ్యవహరిస్తున్న తీరు పలు అనుమానాలకు తావిస్తుంది.నిత్యం బిచ్కుంద మండలంలోని మంజీరా పరివాహక గ్రామాలలో ఇసుక క్వారీలో అక్రమాలు జరుగుతున్నా అధికారులు ఎందుకు పర్యవేక్షించడం లేదని ప్రశ్నార్ధకంగా మారింది.  బీనామీలు ఇస్తున్న మామూళ్లకు అలవాటు పడి అక్రమాలను అదుపు చేయడం లేదనేది స్థానికులు వాదన.అర్ధరాత్రి అధికంగా బకెట్లు ద్వారా జీరో లారీల ద్వారా అధికారులు సొమ్ము వెనుక వేసుకుంటున్నారని స్థానికులు అనుకుంటున్నారు. ఈ అక్రమాలపై జిల్లా ఉన్నతాధికారులు స్పందించి, జీరో దందాకు అడ్డుకట్ట వేయాలని ప్రజలు, ప్రజా సంఘాలు కోరుతున్నాయి.