సెలవులో మాక్లూర్ డెప్యూటేషన్ ఎంపీడీఓ

• యధాస్థానానికివెళ్లాలని గత నెల 8న ఉత్తర్వులు
• వెళ్లడం ఇష్టం లేకనే సెలవు ముసుగు…!

బతుకమ్మ, నిజామాబాద్: మొన్నటి వరకు మాక్లూర్ లో డిప్యూటేషన్ పై విధులు నిర్వహించిన ఎంపీడీవో సెలవులో వెళ్లిపోయారు. ఇంచార్జి బాధ్యతలను నిజామాబాద్ లేదా ఆర్మూర్ ఎంపీడీవోకు ఇచ్చే అవకాశాలు ఉన్నాయని తెలిసింది. అంగట్లో అన్నీ ఉన్నా… అల్లుడి నోట్లో శని అన్నట్లుగా రెగ్యులర్ అధికారి ఉన్నప్పటికీ డిప్యూటేషన్ పై మరొకరిని కొనసాగించడంపై విమర్శలు వినిపిస్తున్నాయి. ప్రస్తుతం ఉన్న ఎంపీడీఓ సెలవుపై వెళ్తే ఇంచార్జి ఇచ్చేందుకు మరో మండలాధికారి కోసం అన్వేషించాల్సివస్తోంది.

యధాస్థానానికి వెళ్ళమంటే…

మాక్లూర్ లో డిప్యూటేషన్ పై పనిచేస్తున్న ఎంపీడీవో.. అసలు పోస్టింగ్ జక్రాన్పల్లి. అక్కడ పని చేయడం ఇష్టం లేక అధికారులు, ప్రజాప్రతినిధుల మచ్చికతో డిప్యూటేషన్ ఉత్తర్వులను తీసుకొని మాక్లూర్ మండల పరిషత్ లో ఎంపీడీఓగా చేరారు. యధాస్థానం విడిచి పరస్థానంలో గత కొన్ని నెలలుగా విధులు నిర్వహిస్తుండడంతో ఆగష్టు 8 న డిప్యూటేషన్ రద్దు చేస్తున్నట్లు జిల్లా పరిషత్ ప్రత్యేక అధికారి ఆదేశానుసారంగా సీఈఓ ఉత్తర్వులను జారీ చేసారు. జక్రాన్ పల్లి వెళ్లడం ఇష్టం లేని ఎంపీడీఓ సీఈఓ ను కలిసి ఉత్తర్వులను రద్దు చేయాలని వేడుకున్నట్లు తెలిసింది. తన చేతి నుంచి దాటిపోయింది, మీరు కలెక్టర్ ను కలిస్తే పరిష్కార మార్గాలు ఏమైనా దొరుకుతాయేమో చూడండి అని ఎంపీడీఓను సున్నితంగా వెళ్లగొట్టినట్లు తెలిసింది. చేసేది లేక జిల్లా కలెక్టర్ ను కలిసి డిప్యూటేషన్ ఉత్తర్వులను రద్దు చేయాలని కోరగా, ఉద్యోగికి ఎక్కడ పోస్టింగ్ ఇచ్చినా చేయాల్సిందేనని, వెళ్లి యధాస్థానంలో చేరాలని కాస్త కటువుగానే ఎంపీడీఓకు కలెక్టర్ చెప్పినట్లు తెలిసింది.

సెలవు ముసుగు :

డిప్యూటేషన్ రద్దు కోరుతూ శత విధాలుగా ప్రయత్నాలు చేసి విఫలమయ్యారు. ఇన్నాళ్లు తనకు వెన్నుధన్నుగా ఉన్నారని భావించుకున్నవారు కాదని వెళ్లిపోతున్నారు. దారులు అన్ని ముసుకు పోయాయని తెలుసుకున్న ఎంపీడీఓ సరికొత్త ఆలోచనకు తెర లేపారు. అదే సెలవు అస్త్రం…. మండల పరిధిలో డిప్యూటేషన్ పై కాస్త గందరగోళ పరిస్థితులు నెలకొనడంతో, సద్దుమణిగాక వచ్చి మళ్ళీ విధుల్లో చేరుతారని మండల పరిషత్ ఉద్యోగులు మాట్లాడుకుంటున్నారు. సెలవులో ఉన్నప్పుడే మండలాభివృద్ధి కార్యాలయంలో జరిగిన వాటిపై విచారణ జరిపితే బాగుంటుందనే అభిప్రాయాలు ఆ ఉద్యోగుల నుంచే వినిపిస్తున్నాయి.