కలెక్టరేట్, బతుకమ్మ : నూతన కలెక్టరేట్ చెత్తాచెదారంతో కంపుకొడుతోంది. ఈ పరిస్థితి భవన పరిసరాలు లేదా గ్రౌండ్ ఫ్లోర్ లోనిది కాదు. ఏకంగా మొదటి అంతస్తులోనే చెత్తాచెదారం పేరుకుపోయినా పట్టించుకునే వారు కరువయ్యారు. మొదటి అంతస్తులోని సివిల్ సప్లై కార్యాలయం ముందున్న మూత్రశాలల పక్కన చెత్త కుండీ ఉంది. దానిలో పేరుకుపోయిన చెత్తను తొలగించకపోవడంతో అక్కడికి వచ్చిన కుక్క ఆ ప్రాంతమంతా చెత్తతో చిందరవందర చేసింది. దీంతో మూత్రశాలలకు వెళ్ళలేని పరిస్థితి నెలకొంది. పరిసరాలను శుభ్రం చేసేవారు ఉన్నప్పటికీ సకాలంలో పేరుకుపోయిన చెత్తను తీసివేయకపోవడంతో ఉద్యోగులు, వివిద పనుల నిమిత్తం వచ్చిన వారు ఇబ్బందులు పడుతున్నారు.